Faamaoniga a le Kapeneta mo se Vaega Tupe e $1.2 Miliona Tala Niu Sila mai Vaegatupe Le Fuafuaina mo le Totogia o Pili o Gasegase ua pasia mo Togafitiga i Fafo
Ua faamaonia ele Kapeneta le Vaegatupe e $1.2 miliona tala Niu Sila mai Vaegatupe Le Fuafuaina mo le totogia o pili o gasegase ua pasia mo togafitiga i atunuu i fafo.
Ua faia lenei fuafuaga ona o le faatuputupulaia pea o le auina atu o gasegase mo togafitiga i atunuu i fafo aemaise lava i Niu Sila. Ua faailoa mai foi e le Susuga Dr. Benjamin le moomia vave o le vaegataupe e $1.2 miliona tala Niu Sila mo le totogiina o togafitiga i latou ua maea togafitiga.
Faatutuina o Masini Faamamatoto i Samoa
Ua faamaonia e le Kapeneta fuafuaga a le Matagaluega o le Soifua Maloloina mo le faatutuina o ni masini faamamatoto i totonu o Samoa.
Ua faatonuina foi le Matagaluega o le Soifua Maloloina ina ia: tofia loa se Komiti Galue e Taitaifono ai le Ofisa Sili o le Soifua Maloloina; tuuina mai i le Kapeneta ia Galuega Faasino a lenei Komiti; ma, faatuina vave se Faalapotopotoga Aoao mo Fatuga’o a Samoa ina ia feutagai vavalalata ma le Faalapotopotoga Aoao mo Fatuga’o a Sigapoa.
O nei faamatalaga uma atoa ai ma ni fautuaga e ao ona tuuina atu i luma o le Kapeneta e fai i ai sana faaiuga talafeagai.
Tautua a le Matagaluega Soifua Maloloina mo Fono a Lotu ma Ekalesia e usuia i Samoa.
Ua amatalia e le Matagaluega o le Soifua Maloloina se faiga faavae fou mo le faasafuaina atu o le tautua a le Matagaluega, ina ia aofia ai ma taimi o fono autu a Ekalesia e usuia i totonu o Samoa.
Ua faia lenei faatatau ina ia tuuina atu ai le fesoasoani tau soifua maloloina mo i latou o loo aofaga potopoto mo nei fono, aemaise o ni faalavelave faafuasei e moomia vave ai le tautua a le Matagaluega. E aofia ai ma le avanoa e fuaina ai le toto maualuga ma faatonu ai loa gaoioiga talafeagai e ao ona fai.
O lenei faiga faavae fou mo le faasafuaina atu o le tautua a le Matagaluega o le Soifua Maloloina, ua faatoa amataina nei mo le Fono Tele a le Ekalesia Faapotopotoga Kerisiano i Samoa, e pei ona usuia ai nei i lona laumua i Malua.