Malaga Afioga i le Palemia mo le Faaaliga o Ata Pu’e o Samoa i Taimi o Siamani i le Tausaga 1904, ma le Fono a le Komiti Faapitoa Faaminisita mo Faatinoga o Galuega a Malo o le Taupulega
Ua faamaonia e le Kapeneta le Malaga a le Afioga i le Palemia, Susuga Tuilaepa Sailele Malielegaoi, e auai atu i le Faaaliga Ata Pu’e o Samoa i Taimi o Siamani i le Tausaga 1904, e faia i Bochum, Siamani mai le aso 19-20 Me. A mae’a lea Faaaliga ona auai atu lea o le Afioga i le Palemia i le Fono a le Komiti Faapitoa Faaminisita mo Faatinoga a Malo o le Taupulega, e faia i Lonetona mai le aso 21-22 Me 2004.
O le Faaaliga Ata o le a faia i Siamani, o se faaaliga o ata o Samoa na pu’e i le vaitaimi o pulea e Siamani ia Samoa i le 1904. O nei ata o loo faaalia ai le tulaga o le laufanua o Samoa i lea taimi faapea foi ma le faatinoga o nisi o tu ma agaifanua a le atunuu. O loo i ai le faamoemoe o le a aumaia i Samoa nei ata pe a ma’ea lea Faaaliga i Siamani.
O le Fono lenei a le Komiti Faapitoa Faaminisita mo Faatinoga o Galuega a Malo o le Taupulega, o loo faamoemoe e faia ai le faaiuga i mataupu i atunuu o Pakistan ma Fiti. E faamoemoe foi o le a fefulisai ai lea Komiti i Lipoti o le a faaoo atu e uiga i isi atunuu o le Taupulega ma tulaga faaletonu sa oo i ai a latou faigamalo e pei o le Atu Solomona.