[ HOME ]

UMUSAGA FALEA’OGA AOGA MAUALUGA ASAU

SAUNOAGA MINISITA O AOGA AFIOGA FIAME NAOMI, Asau, aso 20 Me 2004

Ua paia, ua maualuga, ua matagofie lenei taeao. Ua lava tapena le tatou aso, aua ua i luma o le Atua le tatou fa’afetai ma le fa’amanu ona o lona alofa e le faatuaoia, e pei ona malie i lau tou fa’afofoga ma sa matou fa’alogo i le tapenaga a le Ta’ita’i i lenei taeao. Sa tatou vao’ese’ese, a o lenei ua tatou fuifui fa’atasi, ona o le faamoemoe o le Itumalo ma le Malo, aua alo ma fanau a lenei itu o le tatou atunu’u

A e ua fia fa’aaogaina lenei avanoa, e fa’atalofa atu ai i lau Susuga i le Ta’ita’i tainane le ‘Aufaigaluega Paia a le Atua. Faamalo le lagi e mama ma le soifua maua. Ou te fa’atalofa atu fo’i i le paia maualuga o le Itumalo, Afio fo’i lau Afioga i le Peresetene ma lau Komiti. O le paia lava lea aua le Afifio o Aiga, Alalata’i le Matua fa’apea To’oto’o o Mati’a ma Matiatu’au, tainane uo ma ‘aumeamamae a le Itumalo ma Samoa ua potopoto e lagolago i le nei fa’amoemoe. E le fa’agalo fo’i le Susuga i le Tama’ita’i Pule ma le ‘Aufaigaluega ma le laumua. Talitonu o se lu’itau faigata sa feagai ma outou i le fa’aaogaina lea o maota ma laoa a o faatali le fausia lelei o falea’oga. Malo onosa’i. Lea ua mae’a le galuega mo le kuata fou, a e le gata i lea o le a Kolisi Asau i le tausaga fou, pe a fa’aopoopo le Tausaga 13.

Talitonu, e le o toe po i le silafia a le atunu’u le polokalame a le Malo mo le atina’e o le atunu’u i ona vaega ‘ese’ese, ‘aemaise le atina’e o a’oa’oga. I le tulaga tau a’oa’oga, e pei ona ave i ai le Malo le fa’amuamua, ua le fa’atali le Malo se’i lava se tatou fa’aputuga tupe ona fa’ato’a fa’atino lea o le atina’e. E moni i le tele o atunu’u olo’o fesoasoani mai i tulaga tau a’oga, e pei o Iapani, Niu Sila, Ausetalia, Iuni a Europa, Saina, Kanata, ma isi, a e ua ‘a’apa le Malo i nonogatupe mai faletupe i atunu’u i fafo e fa’atino ai a’oga. O le fua lena, e iloa ai le maualuga o le fa’ataua ua ave e le Malo i A’oa’oga. E mafua i se a? Aua o le lelei tapena ma a’oa’o lelei o mafaufauga o se atunu’u o lona to’afilemu fo’i lena. O lona filiga fo’i lena e sa’ili le tamao’aiga mo le soifua lelei o tagata, e ui ina, e leai ni tatou tamao’aiga fa’alenatura e maua ai seleni mo le tatou atina’e.

Lea ua tu ma fa’aleleia atoa le tatou a’oga i Asau nei, a e le na pau lea, i Salafai nei. Toeititii mae’a Palauli Sisifo i Sala’ilua, ma Amoa i Saipipi. Toeitiiti amata Mata’aevave ma Palauli. Ona totoe ai lea o Alofi-o-Taoa, Itu-o-Tane, Savaii Sisifo ma Vaipouli, o lo’o fuafua e faasolo i ai galuega i le 2005-2007.

Ua mafua i se a ona naunau le Malo e fa’asoa mai le atina’e o Aoga Maualuluga i Itumalo uma o le Atunu’u, a e le fai pea na o Apia e gasolo atu i ai fanau e pei ona sa masani ai. Ua silafia lelei e le Malo le taua o le soifua fa’atasi o matua ma fanau. E le gata i le fa’atonutonu lelei ai o tu masani ma le vafealoa’i, a o le malosi una’i ai e le matua o le fanau i le a’oga, e iloagofie ai fo’i e le matua po o a’oga pe leai. Matauina le fa’aletonu e pa’u i ai nisi o le fanau pe a saili a’oga atu i Apia. Tau su’e se nofoaga e nofo ai. Taugata le tausiga ma le feoa’iga. E le gata i lena, a e a masani loa i ta’iga, ti’eti’e pasi loa ma nofonofo solo i nofoaga faitele i le taulaga. O ia faiga uma, e le o silafia atu e matua o loo alala i Savaii nei. O le atina’e lelei foi o A’oga Maualuluga i Savaii nei o le a taofi ai fo’i ma faia’oga lelei o Savaii i totonu o latou Itumalo e a’oa’o alo ma fanau a le Itumalo, fa’apea le tautuaina o nu’u ma Ekalesia i tonu ma pulega lelei. E le gata fo’i i lea a e o le pulega o nei A’oga, ua taoto lava i Itumalo le fa’atinoina ma le galulue fa’atasi ai ma le Matagaluega ma le Malo.

E tele inaua la tulaga lelei o le fa’asoa mai i tua nei o A’oga Maualuluga e le gata i le fa’amalosia ai o a’oga i le potu a’oga a e fa’aosofiaai fo’i tagata uma o le Itumalo e lagolago le a’oga, aua o le talitonuga, o a’oa’oga o le matafaioi a tagata uma.

O lena ua tou silasila atu i Falea’oga. Ua fai potu kuka ma su’isu’i, potu tusi ma komipiuta, potu Tekinilosi (Technology and Design), ma le Ofisa. Ua fa’aleleia uma fo’i potu tuai. Lena fo’i ua silasila atu i malae taalo, e ui ina e le’i mae’a a e o le tala i le tupe o loo loma nei e fa’ama’ea ai. E le toe tau fai atua sa’u tala i le taua o Ta’aloga. E ui o le malae lea e le o se malae fusu, a e leai se mea o le a le mafai ai ona fai se fa’aaliga a Maselino Masoe i i, pe a asiasi mai.

Ia pei lava ona tatou amata i lenei taeao, o le aso lenei, o le aso o le fa’afetai. Fa’afetai i le Atua ua taunu’u le fa’amoemoe mo le Itumalo ma ana tamafanau. Fa’afetai i le nofo a fa’afeagaiga i tapua’iga ma le va’aiga o le lafu mamoe. Fa’afetai i le Itumalo i le lagolagosua i le Peresetene ma le Komiti. Fa’afetai i matua i le una’i mai o fanau i le a’oga, aua e leai ni fanau, e le aoga nei meatotino e taugata, toeititi lava $2,000,000.00 lona tau.

Lau Susuga i le Matua-o-Faiva ma le Falefa o le tou Aiga, malo le tautua lelei. Toluono, to’aga e fai ia lelei mea a lou motu. Lau Susuga i le Tama’ita’i Pule ma le ‘Aufaigaluega, alo ane laia. E le aoga nei tapenaga pe a le popoto ai tamaiti. O le Motto a le faia’oga: “Onosa’i, Onosa’i, Onosa’i!” Tama ma le Teine A’oga, fai mai tama o le Itumalo lenei, “E fai mea mafai tamaiti o le Itu!.

A tatou ta’ape i le aso, tatou o i le fiafia ma le filemu o le Atua.

Soifua